BUKAN PLAGIAT ?

Oleh: Ali Syamsudin Arsi

cerpen
KADA BAKASUDAHAN

Oleh : Nur Hidayah

1. Aku tahu ai amun baampik sabalah tangan tu lacit ka kiamat kada bakal babunyi.
2. Aku tahu ai amun urang nang kuganang siang malam nangitu kada tahu manahu.
3. Aku maka am ciling-ciling maitung cacak, gulang-gulik bakawan gaguling, ngalih banar mancari guring.
4. Ganap talu sanja sudah kada ampih jua.
5. Aku bingung kada sakira, dusa nangapa nang maulah aku pina mambungul kaya ini?
6. Badiri barangkat rasa mangulir, makan guring kada karuan pangrasa, dibawa balingkar di kaguringan makin mandalami mata luka haja. Dasar liwar sakitnya hati, kada nyanyamanan.
7. Amunnya kada hilap, ari itu ari Jumahat.
8. Napa yu, bubuhannya pina rami handak ka masigitan.
9. Ada jua nang pina ungut-ungutan di buncu warung.
10. Pina habang mata, pina layu, kada basumangat.
11. Luput pulang, kalu.
12. “Ka?” ujarku bagamat mangiyau inya.
13. “Napa, Ding?” ujarnya pulang manyahuti, pina kada tatahu ja muhanya.
14. “Kada ai, Ka ai.
15. Pina lawas kada talihati…”
16. Sambil lihum bapair aku manyahuti rasa saraba salah.
17. Takurinyum ha inya, apakah saku nang dipikirakannya.
18. Aku babanaran kagum.
19. Supan saurangan.
20. Inya nitu kalaliwaran bingkingnya.
21. Kada muha haja pang nang bungas, tapi langkar luar dalam.
22. Lacit ka parut lilit.
23. Inya kada sarik mandangar aku manager tadi.
24. Asa tatilambung aku kahimungan.
25. Dalas tatinggal ngaran, di mana pacah di situ tambikarnya, ujarku dalam hati ka wadah inya.
26. Ditulak inya mantah-mantahkah, aku kada hiran lagi.
27. Kaya apa haja kajadiannya, tatap aku sandang.
28. Nyaman tahu kasudahannya.
29. Aku sanghaja mamilih ari Ahad bailing ka rumah inya, nyaman pas urangnya takumpul.
30. Pas jua ai, jijingian urang batatawaan di palataran.
31. Inya ngitu balima badingsanak.
32. Nang panuhanya sudah babini.
33. Inya ngini anak nang numur dua.
34. Kuitihi adingnya nang bibinian, pina asik badaku lawan nang kaka di palataran.
35. Inya kulihat balogo lawan nang adding numur tiga.
36. Dalam hatiku, wayah ini ada haja nang masih main logo lawan badaku.
37. Babanaran kagum aku lawan kaluarganya ngini, pina ruhui rahayu banar.
38. Inya ngitu jua bisa mambawai paadingan bamainan, padahal umur kaya inya ngini kada cucuk lagi lawan pamainan balogo.
39. Rahatan mandam di muka rumah, takajut aku mandangar ada nang mangiau.
40. “Naik!
41. Aida, maapa di situ?” ujar inya sambil mangawai.
42. “Inggih,” ujarku pulang, sambil lihum.
43. Lawas aku tadiam, umpat baduduk di palataran inya, sambil maitihi kuitan bini maulah wadai.
44. “Ngaran wadai nangini babalungan hayam, tagal kada pas banar kaya babalungan hayam nang sabujurannya.
45. Bila handak maulah wadai babalungan hayam, maka nang disadiakan galapung lakatan satangah biji nyiur.
46. Banyu kapur tiga sinduk, uyah sadikit, hinti gula habang,” ujar sidin lancer bapandir manarangakan, padahal aku kada batakun.
47. Tagal sidin tahu kalu aku pina bingung maliat apa nang digawi sidin.
48. “Hanyar am ulun tahu ada wadai babalungan hayam.
49. Ngalih ai, kakanakan wayah ini tahunya pizza haja, atawa hot dog.”
50. “Bujur jar ikam, Diang ai.”
51. Sidin mangiu aku Diang.
52. Diang ngitu sambatan gasan bibinian bujang di wadahku.
53. Aku ngini badiam di Marabahan.
54. Lamun di Banjar, Diang tu sama lawan Galuh.
55. “Ngarannya Aida, Ma ai,” ujar Ka Dani mamadahi.
56. Panjangnya Hamdani.
57. Sambil malirik ha inya lawan diaku.
58. “Aida, tulung pang ambilakan wadah gasan maudak adunan ngini di dapur,” ujar sidin.
59. “Inggih…”
60. Aku masih bingung, sadadikit kada marasa kulir, nang kaya hadangan ditarik hidung tu pang.
61. Padahal amun disuruh kuitan di rumah, kalaliwaran kulirnya aku.
62. Tagal am ngini nang manyuruh calun mintuha, jarku dalam hati, sambil jihi-jihi saurangan.
63. Aku bakalimpusut ka dapur.
64. Umai, umai, kababagusan dapur urang.
65. Kada tapipirit lawan rumah saurang.
66. Kada jua pang amun harat banar, tapi rasa sanang tu pang bagawian.
67. Pakakasnya kada saraba larang, kada saraba ulin, papan biasa haja, tapi bagus, taatur, barasih pulang.
68. Kaya paribasa jangan baya balingsar, dijilat gin kawa.
69. Cucuk banar lawan nang maharagu, putih barasih lacit ka hati.
70. Mahancap aku maambil nang disuruh sidin.
71. Kalu kalawasan mahadang.
72. Limbah sampai ka palataran, langsung kuunjuk.
73. Tapi sidin kada manyambut.
74. “Ikam haja nang manggawi,” ujar sidin.
75. “Ulun kada bisa,” ujarku, kulir badusta.
76. Mun dasar kada bisa.
77. “Buati galapung lakatan nitu dalam wadah nang ikam ambil tadi, tuangi lawan santan.
78. Tambah banyu parasan daun pudak, banyu kapur lawan uyah, sadikit.
79. Diudak sampai rata, sampai jadi adunan nang sadang likatnya, supaya kawa ditampa.
80. Banyu kapur nitu gunanya supaya ada rasa sintal.”
81. “Inggih,” ujarku manghancap manggawi.
82. “Umai, umai, adingku ngini bisa jua sakalinya maulah wadai, “ ujar Ka Dani sambil baduduk di palatar.
83. “Kada, Ka ai.
84. Mama pian nang malajari.
85. Pian gin harat banar sakalinya, Ka lah, balogo.”
86. “Aku ni, Aida ai, sahibar mananamakan rasa bangga lawan banua saurang, nang kaya lawan parmainan tradisiunal.
87. Supaya adding-adingku ni kaina bisa malastariakannya.
88. Sakira jangan sampai punah.”
89. “Ngalih nang ngaran mantan Nanang Banjar nilah,” jarku pulang, nang disambut lawan karinyum Ka Dani nang maulahku rasa rabah rumpiuh iman.
90. “Ikamkah jua, Aida, handak kulajari balogo?”
91. “Ayu nah, Ka, nyaman humpimpah dulu kita…”
92. Sambil tatawaan kami sabarataan.
93. “Sudahlah, Aida?” ujar mama Ka Dani.
94. “Inggih, sudah.”
95. “Adunan nitu diambil sasanggam, lalu diulah nangkaya babalungan hayam.
96. Tagal di dalamnya diisi dahulu lawan hinti.”
97. “Maulah hinti nitu bahannya nyiur baparut nang anum, bacampur lawan gula habang nang basasap.
98. Ada jua nang ditambahi lawan gula putih, tambahi sadikit uyah, gasan manimbulakan rasa.
99. Samunyaan ngitu buat ka rinjing nang batanggar di api, tambahi sadikit banyu.
100. Diudak rata sampai karing.”
101. Aku takajut.
102. Nang manyahuti lain uamnya Ka Dani, tapi bibinian nang kira-kira 2 tahun di atas aku.
103. Bingking.
104. Putih.
105. Rambutnya panjang maikal mayang.
106. Alis mangumpang parang.
107. Batahi lalat.
108. Matanya carat-cirat.
109. Managuk banyu liur aku malihat.
110. “Naik, Nak,” ujar Umanya Ka Dani.
111. Mandibar sumangatku.
112. Nak ?
113. Rasa bagaritik ai hatiku.
114. “Aida, ngini ngarannya Rahma.
115. Pacarnya Dani.”
116. Taritisan banyu mataku kada sadar.
117. “Aida, ikam kanapa?” ujar Ka Dani.
118. “Kada, Ka ai.
119. Ulun kalimpanan…
120. Ni diapai lagi ?
121. Ulun kada tahu.”
122. “Disumap sampai masak,” ujar Rahma manyahuti.
123. “Ma, ulun mambawaakan pian lawan Abah gangan manis nang isinya kacang panjang, karawila, waluh habang, lawan bayam.
124. Iwaknya papuyu baubar.
125. Miar tupang sasingut Abah,” ujar Rahma
126. Rami buhannya tatawaan.
127. Aku kada sanggup lagi, bapikir handak bulik.
128. Imbah basalaman, aku lalu bagamat handak bulik.
129. Kada jadi manulusakan niat awalku bailang ka rumah Ka Dani.
130. “Hau, kanapa maka bulik?
131. Wadai kita balum masak,” umanya Ka Dani manager.
132. “Anu, ari pina muru.
133. Ulun handak mamutiki tatapasan di rumah.
134. Kalu kahujanan.”
135. Padahal ari liwar bagusnya.
136. Kadada lalu muru, apalagi handak hujan.
137. Rupanya paham kalu Ka Dani.
138. Mahancap inya manyasah aku.
139. “Sudah lawaslah lading ikam tu simpak?” ujarnya batakun babaya kadangaran.
140. Sambil bagariwih tangannya mamusuti kapala lawan bahuku.
141. Kuitihi tanganku.
142. Aku ada mambawa lading.
143. Mambawa plastik banar ai, nang isinya kain sasirangan, gasan umanya Ka Dani.
144. Marigap hatiku, lalu mangarti ai aku, kamana sabujurnya ampah tatakunan inya nangitu.
145. “Hanyar am…”
146. Aku sahuti sambil manggitir.
147. Awakku panas dingin saikungan.
148. Kada wani maitihi muhanya.
149. Imbah maunjuk sasirangan nang bamotif ‘Dara Manginang’, nang warnanya habang tarang, bagamat ai aku bulik.
150. Sambil ingui-ingui manangis.
151. “Banyak nang handak ulun pandirakan.
152. Tapi asa kasat rakungan. Rasa dijarat, dada asa sasak, rasa ngalih manyintak hinak .,” ujarku manutup pander.
153. Inya tamandam mancangangi aku.
154. Matanya nang galak nitu pina muru, pina puang, manarawang.
155. Limbah batunduk satumat, inya takurihing bapair sambil bajauh ampah ka palatar.
156. “Ka, asal pian tahu haja.
157. Cinta ulun ni kadada habis-habisnya gasan pian.
158. Kada bakasudahan…”

159. Jaruju padang jumampai
160. Paikat laki dadaian kain
161. Amun judu baluman sampai
162. Hakikat hati kada ka lain


Juara Harapan II Lomba Mengarang Cerpen Bahasa Banjar Aruh Sastra Kalimantan Selatan (ASKS) VII 2010 di Kota Tanjung, Kab. Tabalong.

Data penulis
Nur Hidayah,lahir di Banjarmasin, 11 Agustus 1991. 10 besar Finalis Galuh Banjar (2009), mahasiswi Jurusan Ilmu Komputer di Fakultas MIPA Universitas Lambung Mangkurat Banjarmasin. Sering menjuarai lomba tulis puisi, cerpen, lomba bakisah bahasa Banjar, lomba model dan pemilihan Diang Barito di Marabahan, Kabupaten Barito Kuala. Puisinya dipublikasikan di Banjarmasin Post dan Radar Banjarmasin. Bergabung dengan Sanggar Seni Rindang Bahalap di Marabahan.


Marilah kita perbandingkan dengan tulisan di bawah ini, lalu bertanyalah kita, bukan plagiatkah itu ?

Cerpen
KARINDANGAN

Oleh : Seroja Murni

1. Aku tahuai amun baampik sabalah tangan tu lacit kiamat kada bakal babunyi.
2. Aku tahuai amun urang nang kuganang siang malam nangitu kada tahu-manahu.
3. Mandingkur karuh urang dihiga nang bini.
4. Aku makaam ciling-ciling maitung kasau, gulang gulik bakawan guguling, ngalih banar mancari guring.
5. Samakin rapat aku bapajam, samakin nampak sidin manggaliwayang.
6. Mandi di burit jamban sudah jua.
7. Dalas manggalatak dagu kadinginan tatap kuariti, asal kawa mancukupakan tujuh subuh.
8. Tapi nangapa hasilnya ?
9. Jangan mau hilang, babangat saapa.
10. Dipadahakan urang mandi banyu yasin, kugawi jua, ganap talu sanja kada ampih jua.
11. Aku bingung kada sakira, dusa nangapa nang maulah aku pina mambungul kaya ini?
12. Masih waraskah aku ini atawa sudah gilakah?
13. Badiri barangkat rasa mangulir, makan guring kada kakaruan pangrasa, dibawa balingkar di kaguringan makin mandalami mata luka haja.
14. Dasar liwar sakitnya hati, kada nyanyamanan karindangan saurangan.
15. Amun kaya ini naga-naganya, jangankan jalanan hidup jalan mati kujalani.
16. Dalas tatinggal ngaran, dimana pacah disitu tambikarnya.
17. Aku musti bailing ka wadah sidin.
18. Ditulak sidin mantah-mantahkah, barungkup baubar lawan bini sidinkah, aku kada hiran lagi.
19. Kaya apa haja kajadiannya tatap kusandang.
20. Nyaman tahu kasudahannya.
21. Lamun dipikirakan lawan pikiran nang waras musti kada tagawi.
22. Urang gila nang mana hakun mailangi bakal madu?
23. Cakadada habar dipahabar urang waras hakun nang kaya itu.
24. Paling kada, urang bpikir dua kali dahulu.
25. Amunnya kada hilap, ari itu ari Kamis.
26. Napa yu, bubuhannya nang baangan-angan handak sugih mangajut nangitu ungut-ungutan di buncu warung.
27. Ada nang batundukan bapicik kapala, ada nang manarawang langit basangga wihang, ada jua nang tasandar maisap ruku, paguni pina habang mata, pina layu kada basumangat, luput pulang kalu.
28. Bangsa pukul sapuluh kakanakan sudah sudah habis bulikan, kami basingsat jua handak bulik.
29. Aku kada singgah di rumah, balarut manurutakan hati, tarus hanya (haja ?) ka rumah sidin.
30. Sidin balum bulik di sakulahan.
31. Bini sidin manyuruh aku masuk sambil takarinyum.
32. Dasar cucuk pata lawan habar, sasuai lawan ngaran Nurjanah, cahaya surga, langkar lawan bibingkingnya.
33. Pangawak kaya bintang pilim, awak sintal mancirunung kaya hintalu bajarang hanyar dikuyak.
34. Pantas lamun guru Ahmad kada kapingin lagi lawan nang lain.
35. Nang ngaran pambawaan hati rusak, kalu pang tahu disupan, dalas tabujur-tahalang, aku kada ingat lagi di burit kapala.
36. Sambil basimbah lawan banyu mata, sakakalinya kukuyakakan samuaan nang ada di dalam parutku.
37. Aku babanaran kagum, supan saurangan.
38. Bini urang itu kada muha haja nang bungas, tapi langkar luar dalam, lacit ka parut lilit.
39. Sidin kada sarik mandangar aku batarus tarang, pina maras saapa.
40. Sambil lihum dikulum inda kikiliran banyu mata sidin, lalu baucap, “Aku basukur lawan Tuhan, amun ikam babanaran hakun maringanakan gawianku,” ujar sidin sambil mamaluk mamusuti awakku, matan di kapala lacit ka balukuk.
41. Kada sasalisih lawan mama wayah mambisai aku manages bahari.
42. “Asal abahnya kakanakan hakun maambil ikam bini, aku kada manangat sadikit-sadikit.
43. Aku ihlas babagi rasa lawan diikam.
44. Sabab, nangngaran judu, rajaki, bahagi diri kalawan maut, itu kada kita nang maatur.
45. Kita kada kawa baindah malawan takdir Tuhan,” ujar sidin sambil bagamat badiri, lalu bakinjut ampah ka dapur.
46. Kada lawas sidin babulik pulang, mambawa dua galas banyu tih kalawan babarapa buting pais panas dalam piring.
47. “Ayu ding, rasaiakan pais ulahanku, kaina amun dingin kada nyaman lagi,” ujar sidin lamah-limambut sambil maarahakan piring pais ka hadapanku.
48. Dasar ulahan urang bingking ka hati-hati, paisnya lamak manis, sintal pulang.
49. Kada kaya paribasa, amun marasa maka tahu.
50. Sadidikit aku kada marasa supan, habis talu buting aku mauntal pais nangitu.
51. Padahal jaka pais tukaran di warung sabuting gin balum tantu kawa aku mahabisakan.
52. “Satumat lagi kaka ikam awan kakanakan bulikan di sakulahan, amun ikam babujuran handak maringanakan gawianku, kita yu dangani aku bamasak!”
53. Sidin mambawai aku ka surambi.
54. Aku makin bingung, sadidikit kada marasa kulir, nang kaya hadangan ditarik di hidung tupang, aku bakalimpusut mairingi sidin.
55. Umai-umai kababagusan dapur urang, kada tapipirit awan di rumah saurang.
56. Kada juapang amun harat banar, tapi rasa sanang bagawian.
57. Pakakasnya kada saraba larang, kada saraba ulin, papan biasa haja, tapi bagus baatur, barasih pulang.
58. Kada kaya paribasa, jangan baya balingsar, dijilat gin kawa.
59. Cucuk banar lawan nang maharagu, putih barasih lacit ka hati.
60. Nang kaya urang patuh lawas tupang, kada cacanggungannya kami bagawian.
61. Sidin mahidupi api, mananggar panic, lalu mambasuh baras.
62. Aku maririp kacang panjang, karawila waluh habang, lawan bayam.
63. “Digangan napa yu ding nang nyaman?”
64. “Tasarah pian haja ka ai, ulun manuruti haja.”
65. “Digangan maniskah, balamakkah>”
66. “Nyamanai kaduanya.”
67. Sidin tamandam mancangangi aku, mata sidin nang galak itu pina muru, pina puang manarawang, mangalum kalu sidin?
68. Batinku bagaritik.
69. Limbah batunduk satumat, sidin takurihing bapair sambil bakinjut mamaraki aku, lalu duduk dihigaku.
70. Bagariwih tangan sidin mamusti kapala lawan bahuku.
71. Rasa apakah kalu pangrasa sidin?
72. Rasa maras banar kalu sidin malihat aku?
73. “Sudah lawaslah lading ikam itu simpak?” ujar sidin batakun babaya kadangaran.
74. Kuitihi lading di tanganku, sing bagusan kadada simpak sadikit-dikit.
75. Marigap hatiku, lalu mangartiai aku, kamana sabujurnya ampah tatakunan sidin nangitu.
76. “Kada, tadapat gin hanyar, pihan ka Jakarta samalam haja.”
77. “Banyaklah urangnya nang umpat panataran itu.”
78. “Parak ratusan ka ai.”
79. “Banyaklah nang anum-anum kaya ikam ini?”
80. “Banyak banar, labih saparu ka ai.”
81. “Nang matan banua kita ini pang barapa ikung?”
82. “Kabalujuran ka ai, kami haja baduduaan.”
83. “Ramiailah makan-guring di kuta ganal?”
84. “Rami-rami sakit ka ai, napa yu, balajar baisukan kamarian lacit ka malam.
85. Rasa lantur pinggang.
86. Amun kada pukul sawalas malam hanyar lapang bahinak, kawa jua mambujurakan batis.”
87. “Damintukah?
88. Dalam hatiku urang basuka barami haja di situ.”
89. “Iya hajaah ka ai, napa lagi amun kaka laki, patahu sidin kada baguguringan.
90. Napa yu, sidin tapilih manjadi urang nang pahaharatnya.
91. Parasa ulun, ulun ni sadang jua bahimat balajar, kada kawa jua manandingi sidin nang sudah tuhanangitu.
92. Tapipiritnya haja cakada.”
93. “Buh…, kada juaah kalu ding?”
94. Sidin takarinyum kahimungan.
95. “Bujur tu ka ai.”
96. “Ayu ja dingai, amun dasar judu Tuhan patut haja tu alurnya, tapi amun kahandak iblis haja hilang saurangan haja kaina.”
97. Sidin badiri mamaraki panci nang gagalagak manggurak.
98. “Parasaku, tangah hari nyaman digangan manis haja.”
99. “Inggih, iya ai, napa lagi amun iwaknya papuyu baubar, miar tupang sisingut.”
100. Aku mangalangkang saurangan.
101. “Bujur dingai, acannya padas-padas, buj tapaluh, kada kalihatan tupang mintuha lalu.”
102. Sidin umpat jua tatawa, rasa kahimungan dimapakah kalu.
103. Rami banar kami batatawaan, rasa bagaya awan kakaku di rumah tupang.
104. Kaya patuh lawas, sampai aku kada ingat lagi, amun bibinian di hadapanku ini bini urang nang maulah aku tagila-gila.
105. Kada lawas limbah kami bakakaut basasadi, kadangaran bunyi urang mangatuk lawang di luar.
106. Kami sawat bamamandaman satumat mandangarakan, lalu sidin maungut sambil lihum dikulum.
107. “Bukai ding, itu kaka ikam sudah datangan!”
108. Sidin manyuruh (aku?) nang mambukaakan lawang.
109. Rasa ringan aku balimbai, badadas bakinjut, kupang-kapik kada ingat di burit kapala lagi.
110. Mandapat kanugarahaan ganal yang kaya ini.
111. Pas banar lawan urang mancari undayang tadapat suluh.
112. Hanyar sadikit lawang itu kubuka, mandirau nang di luar mambari salam.
113. Mandibar darahku, takibar sumangatku, muntung rasa barat diungapakan, tapi kupaksa jua, biar bagugu tatap haja kusahuti.
114. Sabab, ujar urang badusa amun kada manyahut.
115. “Pabila ibu kasini?”
116. Guru Ahmad batakun sambil manyurung tangan.
117. “Hanyaram.”
118. Aku manyahut sambil manggitir, awakku panas dingin saikungan manyambut tangan sidin basalaman.
119. Anak sidin dua ikungannya, nang kaka bibinian, adingnya lalakian.
120. Kaduduanya bingking lawan lalangkarnya, bungas nang kaya kuitannya jua.
121. Rasa marigap dadaku, limbah nang badua naitu sujud mancium tanganku.
122. Aku rasa himung banar jaka adingku di rumah mau jua nang kaya ini.
123. Rupanya urang di rumah ini sudah tapatuh, limbah basilih baju kada tarus balajur makanan, tapi mambasuh siku dahulu.
124. Pina rakat banar, taatur bagantian.
125. Rasa iri hati malihat urang pina akur banar saparanakan.
126. “Ikam kada bahalangan kalu ding?”
127. Nang bini batakun malihat aku batajukan.
128. “Inggih, kada.”
129. Aku manyahut rasa saraba salah, tapi rasa kada purun pulang mangaramputi sidin.
130. “Tampulu takumpul kita baimbai haja sabarataan, malah tabanyak pahalanya, iya kalu bah?”
131. Nang bini mangijipi lalakiannya sambil lihum bapair.
132. “Iya hajaah, ujar nabi kita sambahyang bajamaah tu dua puluh tujuh kali lipat pahalanya.”
133. Nang laki manahapiakan.
134. “Ambilakan Ti, mukana mama nang hanyar di lamari sagan acil ikam!”
135. Ujar kaka bini manyuruh nang anak nang pangganalnya.
136. Dasar anak urang nang paasian lawan kuitan, kada banyak bunyi kada, babaya libas baamin limbah baudu, mangunyur ka kamar.
137. Aku gin kada kawa bakutik jua, rasa ringan manggawi nang sidin padahakan naitu.
138. Kada mahadang salang disuruh lagi aku bagamat manumpangi piring bakas makanan, limbah malihat sidin badiri laki-binian.
139. “Kada usah gin dingai, Yanti bisa haja manyimpunakannya.”
140. Kaka bini mangijipi aku, inda muyung muntung sidin mambari utau, mambawai aku kaluar.
141. Aku babanaran jadi urang nang paling paasian hari ini.
142. Aku manurut tarus nangapa haja nang sidin kahandaki.
143. Kami dudukan di kursi di pamindangan, kaka laki mangitik maisap bintul.
144. Pinda nyaman banar kada sakira, mangapul kukus tmatan muntung wan hidung sidin.
145. Kaka bini batumat bagurimih mangisahakan maksud kadatanganku, pajam buncilak sidin bacalatun, matan di alip lacit ka nang paampihan, sabatik-batik kadada nang kalumpanan.
146. “Ikam pang kaya apa?”
147. Kaka laki batakun lawan bini sidin.
148. “Siapa nang hingkat mangikis judu Tuhan?
149. Amun itu sudah kahandak nang di atas, ulun ihlas ka ai.
150. Napa lagi adding ini anum banar lawini, kasian amun balalawasan basakit hati.
151. Ulun marasa badusa ganal, amun inya sampai kada kakaruan naajar di sakulahan.
152. “Amun ikam akur badudua, rasa kawa haja batuturutan, aku kada kawa jua baindah.
153. Ujar urang badusa ganal amun maliungi rajaki nang handak bahinggap, mubajir.”
154. Lanjar kurihing sidin handak samap ka talinga.
155. “Tapi amun ikam bakal bacakut papadaan, bakal mariributakan urang sakampungan, bakal mambari malu kadang warga haja, baik paraya ha.”
156. Ujar sidin pina nahap.
157. Kami bacacangan lawan kaka bini, babarapa kali sidin mangijipi aku sambil unggut-unggut mambari utau, manyuruh maakuri, tapi muntungku rasa ngalih banar diungapakan.
158. “Urang balaki-babini itu kada kawa bacucubaan, kadada kawin iincaan.
159. Jadi musti digugu dahulu, apa ngalih mancabut amun sudah tabarusuk pander.”
160. Ujuar sidin makin banahap.
161. Kami tamandam badudua, batundukan maipii buku pandir sidin.
162. Saikung-ikung kadada nang waninya maangkat muha.
163. Hinip sangiuk, kada sing burinikan, kaya malihat malaikat lalu.
164. “Damintu ha.”
165. Ujar sidin mancangangi muhaku, “Ikam hakunlah kusuruh sambahyang tahjud 41 malam?”
166. Sidin cangang kada sing kilipan, rasa mancucuk lacit ka jantung.
167. Nangaran hati handak, aku kada bapikir panjang lagi, balajur haja baungut sambil manyahut, “Ayu ja ka ai,” ujarku babaya kadangaran.
168. “Kaina amun kada hilang jua, ikam bapadah kasini, nyaman kaka ikam nang badatang ka rumah ikam.”
169. Ujar sidin takarinyum.
170. Malam Jumahat itu jua aku batumat manggawi sambahyang tangah malam.
171. Malam itu aku bangun parak kasiangan, parak pukul tiga subuh.
172. Ngalih pang mambuang batu ka palatar, nangaran balum tapatuh manyubuh, rasa ringkut raat awak malawan dingin.
173. Samalaman, dua malam, talu malam balum kalihatan lagi cirri cagar mambari bakas, tapi imbah ganap malam nang kasalikur, labaram karasaan banar padilatnya.
174. Aku makin cangkal bangun mambasuh siku, jangan tatinggal nang wajib nang sunat haja asa rugi.
175. Makan sasain nyaman, guring sasain janak, bagawian sasain basumangat, pikiran nang kada kakaruan hlang saurangannya, kaya mambuang kalipanan.
176. Aku singhaja mamilih ari Ahad bailing ka wadah sidin, nyaman pang urangnya takumpulan.
177. Pas jua ai jijihian urang tatawaan di palatar, umanya badaku awan nang ganal, abahnya bacatur awan nang halus. Inda sanang banar pinanya.
178. “Ulun ini ka ai handak bapadah lawan pian, ulun handak umpat manjarat tali kakaluargaan lawan kaluarga di rumah ini sarumahan.”
179. Aku mambuka pandir imbah basasalaman.
180. “Ayu ja dingai, aku akur banar amun ikam hakun jadi kaluarga kami.
181. Tapi amun kada salah rikinanku ikam ini balum wayahnya manuntut janji.”
182. Ujar kaka bini
183. “Ulun kada handak manuntut janji ka ai, ulun handak nang tapisit pada naitu.”
184. “Kada usah bamajas bamantikah ding ai, sambat haja tarus tarang, nyaman kami mangarti sarumahan.”
185. Ujar kaka bini inda kasasahangan.
186. Aku kada purun malihat sidin nang kaya itu, balajur aku basungkam di asuhan sidin, 187. “Tampani ka ai ulun ini manjadi dangsanak pian dunia ahirat, mintu jua lawan kaka laki, jadi kakanakan pian sama lawan kamanakan ulun di ujud.”
188. “Adingku ai!”
189. Ujar sidin sambil mamaluk aku saling pisitan.
190. Banyak pang nang handak kupandirakan, tapi asa kasat rakungan, rasa dijarat, dada asa sasak, rasa ngalih manyintak hinak ………….. sadang haja kalu lah ?????????
191. Hinggan di sini haja dahulu …. Aku mangannnttuuuuuuuuukkk banar …….

Kuta Bahalap, Oktober 1993